العتاب هو من التصرفات الرائجه بين الاحبه وهو نوع من المخاصمة ولكن ليس كأي مخاصمة فعندما تخاصم شخص عادي ليس كمثل عندما تخاصم شخص مقرب لقلبك ، وهنا يمكنك ان تفهم معنى العتاب حيث ان ذلك التصرف يتم حين تتشاجر مع شخص فيجعلك تحزن من طريقة كلامه او اي شي فترجع له بعد مرور ذلك الموقف وتعاتبه على ما كان منه لعله يفهم ويرجع عن ما كان قد بدر منه تجاه ذلك الشخص ، والعتاب هو من اسمى انواع المخاصمة حيث انك لا تخاصمه ولكنك تشير إليه في موقف قد فعله واحزنك ، والعتاب يعد أحد أخف درجات الخصام حيث انه هناك بعض المواقف لا يقدر الإنسان على مخاطبة الإنسان بل يخاصمه في نفس الوقت.
شعر شعبي عراقي عتاب للحبيب مؤثر وملهم.
- راح أصبر بدونك وأرهم بلياك
وأذبح رمش عيني الجان يبجيلك
وأتحمل عذابك والبعد والشّوك
وما حط صورتك كدّامي وأشكيلك
ما أكلّك نسيتك بس جرح بالرّوح
يكسر واهسي وما يقبل أمشيلك
عيني الشّالتك كلتلها أشيلج راح
كالت شيلني وما قبلت تشيلك
وجرحي ألفاك صدره وما يريد خيّاط
واكف جنُّه واحد جاي يدعيلك
بس مجبور أدفنك يا عشك يا شوك
وأقرى الفاتحة وبالوحشه أصلّيلك
بعيوني الحزن يقرونه اليواسون
والفوك الحزن لو تدري شاحجيلك
شمّات الأجو وأسوني ثالث يوم
حيل ويّاك كالو مدري شدّ حيلك - أجى واحد عليّا وكالي شبيك؟
أحسّ حملك ثكيل ودمعة بعيونك
وأحسّ داخل كليبك نار تشعل نار
وأحسّ ظهرك حنيتة وهدّلن متونك
كتلة القصة هيج وهيج بيّا الصّار
صـــــاح: الله أكبر، عمّي خيعونك
ما يسوون إظفرك خلهم يولّون
ما عدهم كلب ذولا اللّي يخونونك
تتعذّب عليمن أنتَ هم إنسان؟
بس دوس أعلى كلبك لا يدوسونك
وعليمن تنتظرهم والله ميرجعون
حيــــل بعيد صاروا ما يذكرونك
ولو بيهم أمل أنتظر جان ويّاك
بس قاسي كلبهم ما يفيدونك
وأُخُذ منّي نصيحة وعوف دمع العين
صافن لا تظلّ باجر يعبرونك.
- مو عدل
مو ميت عدل وإكبالي أشوفك دوم
وأتامّل رحيم الغيبتك رجعة
ما صدّك غفل يا بويا عنّي تروح
مستعجل تريد فراكنا بسرعة
كدّامي القلم كلّ ساعة أشمّن بيه
بلكي علقلم نيشان من صعبة
وشكد ذكريات مخلي عالورق
وحجايات حلوه أبالي متجمعة
نقرى بدفترك حد ما تطيح عيون
والبوم الصّور نشتاق ونطلعه
عيني عالدّرب من ربعك إيردون
أكولن بلكي أشوفن جاي وي ربعه
ويطول انتظاري او وكفتي علـ باب
عين اتاني تبقى وعين بالدّمعة
شريد أنسى يمّا منيلّي النّسيان
هو الجرف ينسه الماي ويودعه
يا بويا العراقيّة تسولف بيك
لمّن تذكر اسمك كلبي اتكطّعه
تبقى عيوني تربي مكابل الشّاشات
بلكت صورتك لو صوتك تسمعه
ظلمة ليل صارت دنيتي بلياك
يلحاروك حياتك للوطن شمعة
أنت وكل شهيد والطّاح وفّه الكاع
يا سيف العراق أو مهرته ودرعه
اقتع روحي يمكن لو كلت أنساك
بس كلبي الدّفنته ويّاك شيقنعه - منين إجيت
الدّنيا مو دنية عشك يبن الحلال
لا تخلّينه بمحبتك ننجبر
أنت ابن العافية وابن الدّلال
واحنا ولد الموت ربّانا الفقر
بينه وبينك فرق كلش جبير
وما نكول أسباب كلّ هذا الفرق
وما نكمل السّالفة لحد الأخير
أمن الأساس ويّاك مسدودة الطّرق
ويّاك ما نرهم وما ترهم محال
ويّانا ما تكدر تدوم وتستمرّ
وباهو كلّك بالسّهل درب الوّصال
وأنت تدري دروبنا مورثة جمر - منين أجيت وبالعشك عندك يقين
منين اجيت وياهو سوّالك درب
أنطيني مهلة وخلّ أشوفن وضعي زين
وخلّ أشوف أنوب هم أكدر أحبّ
كلبي تيهتا وشرد ما أدري وين
وأنّه صار إسنين ما عندي كلب
وخالي كلبك وأنت بعيونك جمال
كل جمال الكون يمّك يعتذر
نبع شفتك يعني كلماتك زلال
والعطش بالرّوح تاركم جم فطر - منين أجيبنلك خلك يرهم عليك
وأنت آية إمن الحسن وأحلا الدّلع
وأنّه يا فرحة إلّا حطّه إبين إديك
وأنّه بجفوفي عمر شلت الوجع
حتّى ما عندي ابتسامة إمنردّ أجيك
وليش تشلع كلبك بكلب انشلع
وليش تطلع خاسر ومشلول حال
وتترك الضّحكة وعليمن تنقهر
راجع أفكارك بعد عندك مجال
ليش بيه تريد كلبك ينكسر - أدري بيك تحبني ما داعي الكلام
وأدري بدموعك صدّك تبجيلي
من تجيني لا تكلّمني بغرام
عَفْيِة عوف الشّوك لا تحجيلي
أنّه ليلي بلايا وأهسّ ما أنام
إشلون لو صرت أنت واهس ليلي
وإشلون لو حبّيت شكلك والخصال
وإشلون لو باجر تروح وتعتذر
هم ترد لمن أكلّك تعال
وتنتظر لمّن أكلّك انتظر
شعر عراقي مؤثر وحزين.
- نخاف من حبّك لأنّ حبّك جديد
ذهب جنّه وياهو إليشوفة إنعجب
والمشاعر فقرة معضدها حديد
وأنت يمّ الفقرة لا تطلع الذّهب
ويّاك ما نصقل بعد لا ما نعيد
عوفنه ولتكول بينولي السّبب
إحنا ما عدنه جواب لأي سؤال
لأن من شفناك تيّهنا الفكر
هم شفت فد يوم كالو للدّلال
ليش متحمّلة حضن نار الجمر
الدّنيا مو دنيا عشك يبن الحلال
لا تخلّينه بمحبتك ننجبر
أنت ابن العافية وابن الدّلال
وإحنا ولد الموت ربّانا الفقر
- ما تحبني
بيني وبين نفسي
إشكد أفكّر بيك
وأكول إشمعنى أنت الشّاغل اضنوني
مو أول عشك خاطر
تشلّ الحال
ولا أول جمال إتشوفك عيوني
شجاها الرّوح
يمّك ذبت الأسرار
وليش أرجف عليك وينخطف لوني
وحتّى النّاس
كامت تعرف بهل الحال
وما أعرف شكلهم من يسألوني
يطبون بصفنتي
وعنك إيدورون
ويلكوني أفكر بيك، يلكوني
وصاحت كلها صاحت
هذا هذا فلان
وما عندي لكوك، وبيك إتّهموني
إتّهموني
بمحبتك والله لو يدرون
على ضيم العليّ إيضلّ يواسوني
ما يدرون عايفني
بمهب الرّيح
وأنّه وياك عفت إلما يعوفوني
- كون ألكاك وأشكيلك
على جروحي ألكيت
الغشمة بيها تروف
وكون ألكاك وأبجيلك وأسوّي خدودي سبّورة
ودمعتي حروف
وكون ألكاك وأحجيلك
بكتاب السّنين إنحذف كلشي الجان
بس اسمك لكيته الباقي ما محذوف
وأذكرك من مسحت دموعي
بآخر يوم على خدودي
أحسّ لهسّه طبع إجفوف
وكون إتشوف
إعيوني مضيف تصير وكت النّوم
وهلبت بلحلم لنّك
تجينه ضيوف
كون أتشوف حالي
شكد إلك ملهوف
- شلون أصبر
غيابك حبيبي إشلون أصبّر الرّوح
يا حال إليظل على حالي من تروح
جرحك بالكلب داويته بس ما طاب
وبطاري السّفر زيدت قلبي إجروح
ما أنساك لو سافرت عشر إسنين
وشوكت ما تردّ باب القلب مفتوح
يمّي أنت وأحسّ بيك إبعيد
وأبد ما فكّرت يجي يوم منّي إتروح
صحيح أنّي كلتلّك سوّي كلشي إتريد
بس على البعد كلتلّك هذا ما مسموح
النّفس أنت الأشمّه ولو تروح شلون
شلون تريد أعيش إنّي بلياك
وإنّي أشتاقلك من إنت موجود
من تبتع أظلّ للصّبح ما أنام
وإذا ما تصدّك نجوم السّما شهود
أموت أني بغيابك لمّن تروح
لن حبّك بكلبي ماله حدود
يوم التّسافر أحجز لشخصين
لأن ميم بالميّة ويّاك قلبي إيروح
وشما تبتعد خلّيه دوم ويّاك
أحسّ ما يظلّ بروحي بس مذبوح
شي يبقالي بحياتي وأنت ما موجود
بس همّ وأذيّه وألم وجروح
رسمك كمت أشوفه من أغمض العيون
ولو يعمن عيوني ما أظنّه يروح
ما أريد أحظنك لو صار الوداع
لأن من أهدّك تطلع الرّوح
عشكتك وأدري أتعب إبحبّك
رضيت بقسمتي وملهوفه تدريني
أريد أكضي العمر ويّاك
تدري أنت بغيابك حيل تأذيني
عيني إلما تشوفك تنعمي وللدّوم
لأن أنت حبيبي فرحة إسنيني
تعال وخلّ أضمّك حيل يهواي
وأريد إبكلّ حنانك أنت تحويني
تعال وخلّ نطفي الفُركة والنّار
وعلى صدرك أنام اللّيل خليني
طويناها صفحتك وانتهى الموضوع
فعل ماضي صفّيت وخلصت المدّة
إش تتوقّع أبوس أجدامك من تروح
وأسحك كبريائي وأطلب النّجدة
صحّ جدمي عثر من شفت طولك لاح
لكن ما نخيتك من طحت عمده
توجيت على جرحي وما طلبت العون
لأن أدري إليطيح إجفوفه لتسنده
صحّ الكمر أكبر والنّجوم إزغار
بس تحلّه السّمة مو بالكمر وحده
وإذا ساكت ترى مو لأن ماكو لسان
مرّات الصّمت من الحجي أبده
وجفّ الماي صافح جفّك بالحسّاس
لا تعتب عليه وتنتخي بزنده
من أكتب شعر لا تعتقد بطران
البلابل بالقفص من ظيمه مغرّدة
ما صدّك بعد دمعاتك من أطيح
همّ يهمل دمعة العين لورمده
روح بلا وداع وكل أثر ما ريد
إللّي كتب عالرّمل يعرف قدر كتبه
حرامات التّعب للمايجازيك
وحرمات الوفى للطّبعة خوّان
جرحك بالملح تكدّر تداويه
ويزيدك عطش لو جنت عطشان
شما تتعب على العكرب تربية
يلدغك لو جنت لحظه غفلان
تترجى الوفا أي وين تلكيه؟
وتتأمّل تمر من جذع ذبلان
وفي نهاية المقال نتمنى للمتحابين ان لا يوجد ضغينة بينها ، وهذا من أجل سلامة العلاقات سواء النفسية او الجسدية او ايا كان ، ويجب عليك ان تعلم وتقتنع ان العتاب هو وسيلة راقية لتوصل معاني حزنك للشخص الذي فعل ذلك دون ان يكون هناك أي مشاجرة بينهم وذلك دليل على مدى رقيك ومدى قوتك في عدم الانصياع تحت رغبة الغضب ، ولعل العتاب هو أحد أهم الخطوات التي يتخذها الانسان للرفع من مستويات ضبط النفس له ولعلك استفدت مما قاله الشعراء عن العتاب في تلك المقالة .
